Премиерот Христијан Мицкоски изјави дека отпочнувањето на изградбата на автопатот Скопје – Блаце претставува историски момент за државата, истакнувајќи дека по повеќе од две децении ветувања, проектот Конечно станува реалност.
На настанот организиран по повод почетокот на градежните работи, на кој присуствуваа претседателот на Собранието Африм Гаши, косовскиот премиер Албин Курти, како и министри, пратеници и градоначалници, Мицкоски подвлече дека новата автопатска делница е од исклучително значење за економското и транспортното поврзување меѓу Македонија и Косово.
„Зборувам за нашите две земји, Република Косово и Македонија — за граѓаните помеѓу двете земји ќе значи подобра економија, подобро поврзување, подобар транспорт, подобар размена, нешто што претставува исклучително важен атрибут, посебно во 21 век и во корелација со нашите стратешки приоритети како Влада“, истакна Мицкоски.
Премиерот нагласи дека градежните работи ќе ги изведува домашна компанија, што ќе обезбеди дополнителна додадена вредност за македонската економија и нови работни места.
Се најавува интензивирање на градежните активности низ целата земја
Во своето обраќање, Мицкоски најави дека наскоро ќе започнат активности и за делницата од Букојчани до Кичево, со што земјава влегува во период на интензивна изградба на патна инфраструктура.
„Со тоа во еден момент ќе се создадат услови на територијата на државата да се градат 6 автопатски делници, нешто што досега никогаш во минатото не се случило. Тоа се делницата од Блаце до Скопје, делницата Тетово – Гостивар, од Гостивар до Букојчани, од Букојчани до Кичево, од Кичево до Охрид и од Прилеп до Битола, нешто што навистина претставува историски момент за нас граѓаните, но и за државата генерално“, посочи тој.
Мицкоски порача дека преку овие капитални проекти се инвестира во иднината на младите за тие да останат во земјава.
„Ние денеска отпочнуваме да градиме иднина, иднина за нашите млади. Бидејќи во политиката политичарите се минливи, ги ценат по она коешто ќе го остават зад себе и делата коишто ги оставаат зад себе. Ние како политичари во оваа наша македонска Влада мислам дека ќе оставиме капитални проекти, капитални дела коишто ќе ја одредат иднината на државата и ќе обезбедат иднина за младите“, изјави премиерот.
Тој заклучи дека фокусот на Владата останува врз економскиот развој, владеењето на правото и борбата против корупцијата.
„Бидејќи патриотизмот во 21 век претставува нешто многу повеќе од националромантични идеи претставува силна економија, добар стандард и граѓани коишто се задоволни од институциите и Владата, борба против криминалот и корупцијата и владеење на правото. Тоа се врвните приоритети на оваа македонска Влада“, порача Мицкоски.
