Малиџано е намаз со богат вкус и кремаста текстура. Подготвен од печен модар патлиџан, павлака и лук, совршено се вклопува како предјадење, појадок или лесна летна закуска.
Состојки:
- 2 средни модри патлиџани
- 400 мл кисела павлака
- 3-4 чешниња лук (или по вкус)
- 1-2 лажици мајонез
- 1 лажица масло
- сол по вкус
- 1 рака ситно сечкани ореви
Подготовка:
Измијте ги модрите патлиџани и ставете ги цели, со кората, во загреана рерна на 200°C. Печете ги околу 30 минути, односно додека не омекнат. Времето на печење може да варира во зависност од рерната и големината на патлиџаните. Оставете ги патлиџаните да се изладат, потоа излупете ги и изблендирајте ги или изгмечете ги со вилушка.
Доколку се добро испечени, лесно ќе се обработат и рачно. Во садот со патлиџанот додадете масло, сол, ситно сечкан лук, кисела павлака и мајонез. Добро измешајте додека не добиете кремаста смеса. Количината на лук прилагодете ја според вашиот вкус. Имајте предвид дека по неколку часа во фрижидер вкусот и мирисот на лукот стануваат поинтензивни.
На крај додадете ги ситно сечканите ореви и нежно промешајте. По желба, можете да ги изоставите мајонезот или оревите, бидејќи намазот е вкусен и без нив. Ставете го малиџаното во фрижидер најмалку 1-2 часа за вкусовите убаво да се соединат. Послужете го како предјадење или намаз со свеж леб, тостиран леб или домашни лепчиња.
МИА
