Има сè повеќе повици за целосна забрана на транспортот на жив добиток. Најновиот случај, кој доведе до колење на 780 млади бикови, беше предизвикан од едноставно, бирократско недоразбирање.
Имено, алжирските власти одбиле да ги истоварат животните кои пристигнале од Франција, поради „неточни“ здравствени сертификати и поврзани здравствени ризици, пишува Splash.
Проблемот настанал бидејќи на документите за вакцинација пишувало „IBR позитивно“. Француските власти изјавиле дека во Алжир погрешно сфатиле дека биковите се носители на заразниот говедски ринотрахеитис (IBR), наместо дека таа напомена се однесува на вакцинацијата што ја примиле.
Враќањето во Франција не било можно, бидејќи во меѓувреме биле нахранети со сено од Алжир, каде што е широко распространета болеста шап и лигавка. На бродот останале околу три недели додека не завршиле преговорите за враќање во земјата извозник. Откако стигнале до француското пристаниште Сете, биле заклани, а потоа запалени.
Забрана за транспорт по морски пат
Секоја година околу 3 милиони говеда, овци и кози се извезуваат од Европа во трети земји, а Франција најмногу извезува во Алжир и Израел.
Фондацијата за заштита на животните во Фрајбург предупреди дека вакви случаи се случуваат секоја година. Во 2021 година, 2.600 говеда морале итно да бидат заклани по тримесечното патешествие по Средоземното Море.
Европските организации за заштита на животните бараат да престане извозот на жив добиток во трети земји. Тие наведуваат дека недостатокот на планови за вонредни ситуации и слабата имплементација на постоечката законска регулатива и понатаму ќе води до катастрофи.
„Транспортните инспекции се ретки во пристаништата и не постојат на бродот, недостигаат податоци за болните, повредени, изнемоштени и угинати животни“, предупредуваат оттаму.
Тие нагласуваат дека бродот „Надер А“, кој ги превезувал, е изграден во 1977 година, а адаптиран за превоз на добиток во 2013 година. Тој плови под знамето на Того и е на црната листа според Парискиот меморандум за контрола на државните пристаништата, а уште во 2017 година му бил забранет пристап од сите пристаништа што го потпишале тој документ. Во 2018 и 2019 година, пловилото беше прегледано пет пати и беа констатирани 22 недостатоци.
