Здружението „Амброзија“ од Пехчево го заокружи проектот за одржување и ревитализација на стари овошни дрвја во регионите на Малешево и Беласица. Проектот се реализираше во изминатите 18 месеци со цел мапирање, идентификација и заштита на автохтоните овошни сорти во двата региони.
-Во рамки на проектот во изминатиот период одржавме работилница која опфати презентации, практична обука во Едукативниот центар за зачувување на природата во Негрево, како и теренски активности на повеќе локации во општина Берово. На настанот учествуваа љубители на традиционалното овоштарство, млади земјоделци и претставници на локални организации од Малешево и Беласица, информираше Јасминка Пашалиска Андоновска, претседател на здружението Амброзија.
Во рамки на работилницата, учесниците добиле практични знаења за правилна резидба, одржување и ревитализација на стари овошни насади, како и техники за нивно размножување и долгорочно зачувување, со посебен акцент на одржливите практики и прилагодувањето кон климатските промени.
-Работилницата ја водеше професорот Тошо Арсов од Катедрата за овоштарство при Факултетот за земјоделски науки и храна, кој во текот на проектот споделуваше знаења за препознавање и зачувување на автохтоните сорти, како и за техниките на калемење. Во текот на реализацијата беа мапирани и идентификувани повеќе од 100 стебла од стари локални сорти овошки во регионите на Малешево и Беласица, додаде претседателката на здружението.
Во рамки на проектните активности, освен работилници за калемење, резидба и ревитализација, реализирана е и работилница за одржливо користење на автохтоните сорти овошки и развој на иновативни производи и зелени бизниси, наменета за млади. Со проектот биле опфатени повеќе од 100 учесници од различни целни групи.
Според Јасминка Пашалиска Андоновска, старите сорти имаат значајна улога во зачувувањето на биолошката разновидност, но и економски потенцијал преку развој на зелени бизниси.
Проектот со којбиле опфатени повеќе од 100 учесници од различни целни групи, здружението „Амброзија“ го реализираше во соработка со здруженијата „Биоматера“ од Бугарија и Македонското еколошко друштво, со финансиска поддршка од Европската Унија преку програмата BestBelt.
МИА
