Максималната малопродажна цена на дизел-горивото од ноќеска на полноќ се намалува за 2,5 денари за литар, а бензините поевтинуваат за 1,5 денар, одлучи денеска Регулаторната комисија за енергетика, водни услуги и услуги за управување со комунален отпад (РКЕ). Со одлуката се врши намалување на малопродажните цени на нафтените деривати во просек за 2,73 отсто.
Максималната малопродажна цена на „евродизелот (Д-Е V)“ се намалува за 2,5 денари и ќе изнесува 95,5 денари за литар, цените на бензините „евросупоер БС-95“ и „евросупоер БС-98“ се намалуваат за 1,5 денар и ќе се продаваат за 82, односно 84 денари за литар, а цената на екстра-лесното масло за домаќинство (ЕЛ-1) се намалува за 3,5 денари за литар и ќе биде 96,5 денари. Со одлуката на РКЕ за 2,084 денари за килограм се намалува и малопродажната цена на „мазутот М-1 НС“ и ќе изнесува 49,227 денари.
Од РКЕ посочуваат дека референтните цени на нафтените деривати на светскиот пазар во споредба со претходната пресметка бележат намалување кај бензините во просек за 2,703 отсто, кај дизелот за 3,251, кај екстра-лесното масло за 3,96 и кај „мазутот“ за 4,476 отсто. Курсот на денарот во однос на доларот по кој беа формирани цените со претходната пресметка е понизок за 0,7165 отсто.
– Напоменуваме дека ова се максималните цени на нафтените деривати од 00.01 часот на 15.4.2025 година. Трговците на големо и трговците на мало со нафтени деривати и горива за транспорт може да ги формираат цените на одделни нафтени деривати и горива за транспорт и пониско од највисоките утврдени цени – велат од РКЕ.
Во најголем дел од бензинските станици во земјата дизел-горивото се продава за три денари пониско од максималната цена што ја определува РКЕ, а бензините за два.
МИА
