Во изминатава седмица имавме променливо облачно време со слаб до умерен северен ветер. Овие временски услови беа добредојдени за изведување на работи во поле.
Денес ќе дува умерен до засилен, а наместа повремено силен ветер (над 60 km/h) од јужен правец. Кон крајот на денот под влијание на циклонска активност, следува период на променливо облачно време со повремени врнежи од дожд. Во петок наместа врнежите ќе бидат пообилни (над 20 l/m² ), а ќе има и услови за појава на ретки грмежи. На некои од повисоките места врнежите од дожд ќе преминуваат во врнежи од снег, а на планините ќе се формира нова снежна покривка. За време на викендот ќе биде променливо облачно и посвежо со повремени врнежи. Ќе дува умерен повремено засилен ветер од северен правец, кој ќе биде поизразен долж Повардарието.
Врнежите од дожд ќе допринесат за зголемување на влагата во почвата, која е потребна во овој период за успешно навлегување на посевите во период на пролетен развој, како и потребната влага која е потребна за пролетната подготовка на почвата за садење на одредени култури. Успехот во растителното производство во голема мера зависи од количината на врнежи во вегетациониот период од март до октомври т.е . за време на активната вегетација на културните растенија. Обезбеденоста со вода е многу важен услов за нормален раст и развој кај сите култури, кај житните култури, кај виновата лоза, кај овошните видови, водата е особено значајна за крошните и гранките. Исто така и есенските посеви продолжуваат со развој за што им е потребна висока влага. Појавата на врнежи од дожд е од големо значење, кој го одржува на исто ниво пролетното будење на овошките, што е поволно во овој период од годината.
Доколку почвените услови тоа го дозволуваат земјоделците може да отпочнат или продолжат со изведување на работи во поле, прихранувањето на есенските култури, припрема на почвата за сеидба на раните пролетни култури, садење на одредени рано градинарски култури, пресадувањето на нови лози на празните места како и други земјоделски активности.
Се препорачува да се преземат превентивни мерки за зацврстување на пластениците и другите конструкции, да се расчистат одводните канали за полесно одлевање на површинските води и заштита од нив.
Минималната температура ќе се движи во интервал од -3°C на повисоките места, до 6°C, а максималната температура ќе се движи во интервал од 7°C до 16°C.
Извор: Агрометео
