Најмалку шест од вкупно десет досега процесирани компании за одгледување медицинска марихуана се наоѓаат во постапка за одземање на лиценците за работа. Ова го сподели министерот за здравство Азир Алиу во изјава за телевизија Телма, појаснувајќи дека овие субјекти не ги исполнуваат законски предвидените услови за вршење на дејноста.
Оваа ригорозна мерка следува во период на засилени вонредни контроли на сите над 40 компании во државата кои поседуваат вакви лиценци. Владата ја иницираше оваа опсежна акција како директен одговор на неодамнешната голема заплена на четириесетина тони нелегално складирана и третирана марихуана.
Министерот Алиу во оваа рана фаза одби да открие повеќе детали за тоа кои точно неправилности ги утврдила стручната комисија на Министерството за здравство, со образложение дека правната постапка сè уште е во тек.
Тој нагласи дека имињата на компаниите кои ќе останат без дозвола за работа нема да бидат објавени пред вторник и оти тогаш официјално ќе заврши процесот, по што јавноста детално ќе биде информирана за конкретните субјекти и прецизните причини поради кои Комисијата утврдила дека тие повеќе не ги исполнуваат строгите услови.
Паралелно со теренските контроли и одземањето на дозволите, ресорниот министер најави и системски промени а министерот рече и оти во следниот период ќе се пристапи кон менување на правилниците кои ја регулираат оваа специфична дејност, со цел да се воведе поголем ред и да се спречат идни злоупотреби.
Извор: 360stepeni.mk
