Годинава Одделението за истраги при Секторот за контрола и истраги поднело вкупно 174 кривични пријави против 361 физичко лице и 126 правни лица, што е за над три пати повеќе споредбено со минатата година кога биле поднесени 53 кривични пријави против 54 физички лица и 23 правни лица. Станува збор за откриени кривични дела меѓу кои царинска измама, криумчарење, недозволено производство и пуштање во промет на наркотични дрога и фалсификување исправа. Ова го истакна директорот на Царинска управа, Бобан Николовски, во интервју во „За или против“ на Алфа телевизија.
На прашање дали се откриени нови криминали со возила, директорот потенцира дека годинава до ОЈО и ОЈО ГОКК се поднесени 89 кривични пријави против 69 правни и 230 физички лица поради основано сомневање за сторени криминални дела со вкупно 204 возила.
„Само до ОЈО ГОКК се поднесени 26 кривични пријави против 50 правни и 160 физички лица, за сторени кривични дела со 90 возила. Заедничко за овие случаи е грубото кршење на законските прописи, при што вмешани се царински службеници, шпедиции, увозници, нотари и полициски службеници. Изработувани се фалсификувани документи и возилата се пуштани во слободен промет без да се плати царина и други увозни давачки во целост, односно давачките се делумно плаќани“, истакна Николовски.
Истрагите резултираа и со зголемена наплата на приходи од увоз на возила. Анализата за октомври, покажува најголем раст на наплатени приходи од увоз на возила, додека на кумулативно ниво, приходите од увоз на возила се на второ место по приходите од увоз на тутун.
Царинска управа
