Околу 300 вработени во германскиот производител на автомобили Опел ќе ги загубат своите работни места бидејќи објектите за тестирање во близина на Франкфурт, кои се меѓу најголемите од таков вид во Европа, треба да бидат затворени.
Францускиот оператор Segula Technologies, кој поднесе барање за стечај, соопшти дека не можел да најде нов инвеститор кој би ги презел локациите за тестирање во Родгау-Дуденхофен и Риселсхајм, што значи дека 287 работни места ќе мора да бидат укинати до крајот на октомври, пренесе ДПА.
Мал тим ќе продолжи да управува со објектите до крајот на годината, додека преодна компанија ќе биде формирана за околу 82 работници, од кои повеќето се долгогодишни вработени, на локацијата Дуденхофен, се вели во соопштението.
Segula Technologies, француски давател на инженерски услуги, почна да управува со голем дел од развојниот оддел на Опел, како и со тестирањето на возилата, откако компанијата беше преземена од француската компанија PSA, матична компанија на Пежо, во 2017 година.
Opel, чие седиште е во Риселсхајм во близина на Франкфурт, е единствениот германски бренд во портфолиото на мултинационалниот автомобилски гигант Stellantis, кој настана со спојувањето на Fiat-Chrysler и PSA.
МИА
