Бугарското Министерство за земјоделство лансира нова национална малопродажна мрежа под името „Продавница за народ“, со цел да се понудат основни прехранбени производи со максимална маржа од 10 проценти, со посебен фокус на домашните производи.
Ресорниот министер Георги Тахов, говорејќи пред собраниската комисија за земјоделство, истакна дека стратегијата на Владата е во овие продавници да се даде приоритет на производите од Бугарија. Иницијативата е насочена кон најсиромашните и најоддалечените делови на земјата, каде што инфлацијата и ограничениот пристап до прифатлива храна се најизразени.
Почетниот капитал на државната компанија зад синџирот е пет милиони евра, но се очекува таа бројка значително да порасне, бидејќи планот е да се отворат до 1.500 продавници низ земјата.
„Нашата цел е да го затвориме кругот од производителот до потрошувачот кога станува збор за основните прехранбени производи“, рече Тахов пред пратениците, нагласувајќи ја амбицијата на Министерството да воспостави одржлив канал за дистрибуција за домашните производители.
Остра критика
Идејата за државни продавници, која првпат се појави на крајот на 2024 година, наиде на остри критики од опозицијата и економските аналитичари. Критичарите тврдат дека продавниците се главно отворени во неразвиените области, што според нив потенцијално им дава дополнителен простор на владејачките партии да влијаат врз гласачите од ранливите заедници пред изборите.
Од друга страна, поддржувачите на оваа мерка нагласуваат дека таа е обид синџирот на снабдување со храна да се направи социјално поправеден и поотпорен.
„Сакаме да покажеме дека е можна социјално ориентирана трговија, а притоа да се грижиме за малите места и за ранливите групи“, рече министерот Тахов.
Владата најавува и составување листа на домашни производители чии производи ќе бидат достапни во новите продавници. Според Тахов, целта е да се воспостават директни партнерства со локалните земјоделци и прехранбената индустрија, со што би се скратиле синџирите на снабдување и ќе се намалат трошоците за крајните потрошувачи.
„Не сакаме да се натпреваруваме со постоечките трговски синџири“, додаде министерот. „Нашата цел е да обезбедиме полесен пристап до основните производи за граѓаните кои моментално немаат можност да пазаруваат во близина.
Извор – ТРН
