Иван Пешевски од Сојузот на Синдикати на Македонија во Отворено рече бојкотот е првиот чекор со кој би се направиле промени. Според него, државата наместо да поддржува бојкоти потребно е да реагира и да казнува со цел соодветно да се регулира пазарот.
„И во минатото сме повикувале и на протести и на штрајкови и сега повикуваме да се бојкотираат одредени маркети, повикуваме да се бојкотира само во петок ако не се сменат работите ќе продолжиме со повеќедневен бојкот на одредени маркети. Решението е да бојкотираме тука а не да пазариме во странство“, рече Пешевски.
Тој рече и дека државата треба да застане во одбрана на граѓаните и да почне да делува строго. Според него казните за непочитување на Законот за нефер трговски практики се миинимални во споредба со приходите.
„Ако навистина им се даде налог на инспекциите сметам дека ќе ја завршат работата но дали се тоа само мерки или политички изјави, ќе видиме. До денес немало некои мерки со кои ќе се заплаши некој. Синџиирот ќе се сведе на тоа дека државата треба да биде поригорозна за да видиме дека некој ќе ја плати казната како тоа што го прави народот постојано. Животот и стандардот е прескап и немаме друг избор.Треба да се стрпи народот, да покаже жолт картон“, додаде Пешевски.
Тој објасни и дека зголемувањето на платите и пензиите за неколку илјади не е причина за инфлацијата бидејќи како што објасни тој, разликата на цените од 2010 до 2020 е огромна а платите не се покачени доволно.
