Куба објави дека изнајмила земјоделско земјиште на виетнамска компанија за одгледување ориз, што претставува прв пат да ја предаде контролата над одгледувањето на странци.
Државната земјоделска компанија влезе во тригодишно партнерство со неименувана виетнамска компанија за заедничко одгледување житни култури во провинцијата Пинар дел Рио, на површина од 3.000 хектари. Информациите сигнализираат дека закупот може да биде продолжен и областа да се прошири, пишува весникот на Комунистичката партија Гранма.
„Ова е прв случај земјиштето да се префрли на странска компанија која ќе ја преземе контролата врз нејзиното одгледување“, рече Хорхе Фелиз Шамизо, заменик директор на агроиндустриската компанија Гранос де Лос Паласиос. Куба годишно троши до 700.000 метрички тони ориз, од кои најголемиот дел се увезува од Виетнам.
Но, резервите на основната храна беа ретки во последниве години поради економската депресија предизвикана од недостигот на конвертибилни валути за увоз на храна, гориво, резервни делови, суровини и земјоделски производи.
Куба произведе најмногу ориз во 2018 година, пред почетокот на кризата, вкупно околу 250 илјади метрички тони. Производството во меѓувреме е намалено за повеќе од 80 отсто, објави заводот за статистика.
На крајот на октомври, Генералното собрание на Обединетите нации (ОН) повторно со големо мнозинство ги повика САД да го прекинат ембаргото кон Куба, при што кубанскиот претставник истакна дека финансиските, трговските и економските ограничувања досега ги чинеле 164 милијарди долари.
Резолуцијата на ОН со која се повикуваат САД да го укинат ембаргото беше поддржана од 187 земји.
Извор: racin.mk
