Со саем насловен „Вкусот на традицијата“, во Кавадарци денеска беше одбележан Меѓународниот ден на руралната жена. Настанот беше во организација на Комисијата за еднакви можности при Советот на Општината и Здружението за родова еднаквост „Визија“, во соработка со Винскиот музеј, во чиј двор беа изложени повеќе штандови со производи.
– Руралните жени се костурот на многу економии, но нивните придонеси често остануваат непризнати. Овој ден ни нуди можност да размислиме за нивната непроценлива работа и да ја подигнеме свеста за уникатните предизвици со кои се соочуваат, од ограничен пристап до образование и здравствена заштита, до влијанието на климатските промени, рече Елизабета Ристова, директор на Музејот.
Во своето обраќање, Марија Камчева, координатор за родова еднаквост при Општината, рече дека овој саем не е само можност да ги презентираме и пробаме локалните деликатеси и ракотворби, туку и платформа за поврзување, размена на искуства и поддршка на нашите вредни производители.
– Секој производ, било тоа да е домашен специјалитет, мед, колаче, рачно изработен предмет или традиционално јадење, носи со себе приказна и страст на жените кои го обработуваат и создаваат. Денес поттикнуваме и охрабруваме сите да ги поддржиме локалните прозводи, да ја прошириме свеста за важноста на руралните жени и да ја славиме нивната улога во зачувувањето на традицијата и културното наследство, рече Камчева.
Таа истакна дека овој настан е идеална прилика да ги откриеме богатствата на нашата локална култура и да се запознаеме со вредните жени кои работат за зачувување на нашите обичаи. Нивната работа, додаде, не е само економска активност, туку и начин на живот, што ја истакнува важноста на руралната заедница во нашето општество.
Камчева ја нагласи потребата од мерки за зголемување на бројот на регистрираните земјоделки и носителки на земјоделски стопанста преку соодветно вреднување на нивниот труд, законски измени за признавање на нивните права и социјални бенефиции, вклучувајќи родителско отсуство, боледување и пензии, дизајнирање на директни мерки со кои ќе се овозможи вклучување на жените во руралните средини на пазарот на труд и слично.
Пред присутните се обрати и Благица Коцева Тодорова, претседател на „Визија“. Таа истакна дека денешниот саем е и потсетник за потребата да ја поддржуваме секоја жена, секоја рурална жена, да има пристап до сите ресурси, до знаење и можности за раст и развој.
Претседателот на Комисијата, Александар Мукаетов рече дека производите на жените го носат вкусот и духот на нашето наследство.
– Давам максимална поддршка и сметам дека вашата поддршка е клучна за одржување на овие вредности и за поттикнување на руралните жени да продолжат со својот труд. Заедно можеме да содадеме свет во кој ќе се цени и почитува трудот на сите жени. Меѓународниот ден на руралната жена е потсетник дека без нив нема иднина. Правата на руралните жени се правата на сите нас. Ние сме тука за да ги поддржуваме. Секој напор на руралната жена е чекор кон еднаквост и одржлив развој, истакна Мукаетов.
Тој нагласи дека највредната инвестиција е таа во руралните жени, нивната работа носи плодови за целото општество. Притоа додаде дека секое семе што го садат руралните жени е семе на надеж за идните генерации.
МИА
