Можностите кои ги нуди ИПАРД 3 програмата не се исклучиво поврзани со инвестиции во агросекторот. Оваа програма има за цел и поголем рурален развој преку грантови наменети за бизниси кои се водат како услуги на рурално население. Покрај поддршката за земјоделството и руралниот туризам, ИПАРД 3 програмата опфаќа и поддршка на непрехранбени производни активности преку популарната мерка 7 „Диверзификација на фарми и развој на бизниси“. Тука спаѓаат голем број на дејности кои не се директно поврзани со земјоделство или туризам, но според нивната локација се подобни за аплицирање во рамки на оваа мерка.
За Мерка 7 но и за Мерка 1 преку која може да се добие грант за нова фарма и други инвестиции во земјоделското и сточарското производство, разговаравме со жителите од Општина Шуто Оризари.
Средбата на Агротим и бизнис секторот во Општина Шуто Оризари се реализира на иницијатива на Сеадин Џафери од организацијата РОМАЛИТИКО, уште еден теренец кој работи во интерес на бизнис заедницата и економскиот развој на општината.
Горно Оризари е рурално подрачје и ги исполнува условите за аплицирање за Мерка 7, за што постоеше голем интерес. Ресторани, нови фарми, погони за производство…беа дел од идеите кои ги разговаравме на средбата.
Среќна сум што оваа иницијатива ќе продолжи, со нови средби, информации и институционална логистика од наша страна, а добредојдена е и поддршката од локалната власт затоа што како и секаде, општината е клучен фактор во обезбедувањето на основните услови за аплицирање за мерките од ИПАРД. Успешната реализација е во интерес на целата општина.
Ленче Николовска
