Во хидроакумулациите во Струмичко има доволно вода за пиење и наводнување, но заради помалото ниво единствено од акумулацијата „Водоча“ е воведена рестрикција за наводнувањето, односно само два пати во неделата ќе се пушта вода до посевите.
Според последните мерења, двете најголеми брани „Турија“ и „Водоча“ се половина полни.
-Во „Турија“ имаме 31 милиони кубни метри вода од вкупно 50, а во „Водоча“ има 11 милиони од вкупен капацитет од 26 милиони кубни метри вода. Размислуваме да го запреме и наводнувањето од помалата акумулација „Иловчанка“ за посевите од регинот на Општина Босилово, бидејќи нејзина примарна цел е да служи за водоснабдување на жителите од седум населени места, информира Лазо Ѓоргиев, директор на АД Водостопанство на Македонија-Подружница „Струмичко Поле“, Струмица.
Додава дека двете помали акумулации „Маркова река“ и „Новоселка“ се полни и и од нив водата може да се користи за наводнување.
Според Ѓоргиев, со вкупните количини вода, посебно во браната „Турија“, не е доведено во прашање редовното снабдување на градот со вода, но сепак апелира на рационално трошење и водата да не се употребува за полевање.
И од струмичкото комунално претпријатие апелираат до граѓаните заради високите температури водата за пиење да се користи рационално и да се избегнува полевање на дворови и миење на површини.
Инаку, во струмичко од акумулаците се наводнуваат површини од околу 2 илјади хектари.
МИА
