Во организација на здружението ,,Пијанечка Пчела 2″ синоќа во Делчево се одржа предавање на тема „Празна кошница”. Предавач беше експертот од Република Србија, Владимир Млаѓан, а виталноста и одржливоста на пчелната заедница беа во фокусот.
-Најголем акцент ставивме на т.н. празна кошница која е актуелна и оваа година, а претставува комплекс од болести. Не можеме се да прикажеме, но пријдовме кон темата од аспект како да се подобри имунитетот и што тука може да се направи, рече Млаѓан.
Годината што измина, оцени, била добра во однос на родот.
-За жал, штетите беа големи. Резултатите до април ќе се знаат, бидејки страдаа многу пчели. Годинава треба да се следи појавата вароа. Иако е февруари, времето е топло, леглото почнува да се развива, а со тоа и вароата и затоа треба да повеќе да обрне внимание на нејзино спречување. Затоа ќе зборуваме за дезинфекција, додаде Млаѓан.
Според Јованчо Медарски, претседател на „Пијанечка Пчела 2″, ова е прво организирано предавање во 2024 година.
-Оваа работилница е во рамки на годишната програма и со неа ги почнуваме активностите за 2024 година. Предвидени се повеќе предавања, посета на саеми. Се надеваме дека од ова пчеларите ќе имаат голем бенефит, зашто заштитата на пчелните семејства е најважната работа во одржувањето на пчелите. Посебно се задржуваме на синдромот на губење на пчелите во услови кога има мед и полен, дополни Медарски.
Годинава здружението ќе се фокусира на работа со млади пчелари.
МИА
