Регионална работилница за размена на искуства за управување со големи месојади (мечка, рис, волк) ќе се одржува денеска во Клубот на пратеници во Скопје. Ќе учествуваат експерти од областа и преставници на надлежни институции од Хрватска, Босна и Херцеговина, Србија и Северна Македонија.
Како што информира Министерството за животна средина и просторно планирање, програмата вклучува практичен и теоретски дел и обука за идниот тим за интервенции, што ќе се одржи на 7 декември во ЗОО Скопје.
Работилницата се спроведува како соработка на Министерството за животната средина и просторно планирање и Динарско-балканско-пиндската платформа со цел да се отвори можност за заедничка дискусија на ниво на раководители на надлежни служби, експерти, како и научници за пристапите за управување со популацијата на големите месојади во Северна Македонија.
Меѓу целите се и постигнување договор за формирање на координативно тело за големи месојади, формирање на тим за интервенција, собирање и споделување податоци, следење и воспоставување долгорочна стратегија за управување со големи месојади во регионот.
МИА
