Автономна платформа како централен полигон за најмногу шест беспилотни летала, служи за напојување, но исто така и како поддршка од страна на компјутер / процесор на дронови кои берат овошје, додека дронот (еден или повеќе од нив) се движи низ овоштарникот. Вака собраните плодови ги става во сад кој се наоѓа на платформата. Според меѓународното стручно жири, овој теренски робот од израелската компанија Tevel Aerobotics Technologies е добитник на главната награда „Најдобар теренски робот 2020“ или ‘Best Field Robot Concept 2020(BFRC) која бешедоделена деновиве за време на Меѓународниот форум на земјоделски роботи FIRA.
Второто место му припадна на роботот H-WodKa (Холандија), а третото на HayBeeSee Crophopper (Велика Британија), пишува експертот за прецизно земјоделство, Рене Коерхуис за, Future Farming објаснувајќи дека жирито го избра беспилотното летало за берба на овошје на Тевел како најперспективен концепт на робот.
Водени од три силни критериуми: оригиналност, изводливост и потенцијалното влијание врз животот на земјоделците, жирито за наградата BFRC 2020 во потесниот избор (Топ 10) помеѓу 22 различни концепти на роботи од 11 земји и четири континенти ги вброи и следните иновативни решенија: AI.Land ETAROB, Fendt Xaver, Fieldwork Robotics, HayBeeSee Crophopper, H-WodKa Robotiller, iTarra, Nexus Robotics, Robotics Plus, Tevel Aerobotics и thingc Robotics.
Членовите на жирито имаа предвид два дополнителни критериуми во случај на еднакви резултати ,а тоа се: леснотија на прифаќање или усвојување од страна на земјоделците и одржливост на решението.
Публиката, односно посетителите на FIRA и читателите на Future Farming, имаа можност да дадат свое мислење за најперспективниот концепт на робот за работа на терен од списокот на Топ 10. Својот глас го дадоа 2.359 лица, од кои најголем број гласови доби британскиот робот за собирање малини и капини Fieldwork Robotics (40% од гласовите), додека речиси во фотофиниш се одлучи за второто и третото место.
Имено, на второто место со 18,7% гласови е исто така британскиот робот за отстранување на плевел Crophopper, а на третото место со 18,2% гласови е холандскиот теренски робот H-Wodka Robotiller .
Во последниве години, воведени се десетици модели на земјоделски роботи кои треба да им го олеснат животот на земјоделците, вклучувајќи и роботи кои одгледуваат земјоделски култури со помалку работна сила, хемикалии и ѓубрива и помали емисии на стакленички гасови, рече авторот, додавајќи дека некои од нив го пронашле својот пат до фармите ширум светот, но повеќето сè уште се во почетна фаза.
Останува да видиме следната година кој нов теренски робот ќе биде најоригинален и кој ќе има потенцијал да придонесе за зголемено и поодржливо производство на храна, односно кој концепт ја заслужува „Наградата за најдобар теренски робот“.
Извор: Агроклуб
