Официјалната посета на Република Словенија министерот Љупчо Николовски ја започна со конструктивна средба со министерката за земјоделство на Словенија, Ирена Шинко.
„Словенија е наш безрезрвен поддржувач и докажан пријател од каде црпиме искуства во многу области. Токму Словенија е нашиот пример по кој ќе се водиме за уште позелена Северна Македонија.
Ја продолжуваме соработката помеѓу двете министерства во делот на искуствата од Словенија за борба против нелегална сеча и заштита на шумите од пожари. Драгоцена ќе биде и поддршката и за нашиот нов проект, новата реформа во шумарството, и реорганизација на „ЈП Национални шуми“, со што состојбите значително ќе се подобрат и усогласат со европските.
Разменивме искуства во врска со политиките во агросекторот, но највеќе посветивме внимание на вклученоста на младите во земјоделството, и задругите кои претставуваат силен фактор во земјоделството. Црпиме искуства и знаења од успешните примери, и со задоволство ќе им ги пренесеме на нашите млади земјоделци.“, напиша министерот Николовски на неговиот фејсбук-профил.
