Од првиот случај на Африканска свинска чума на подрачјето на Хрватска, оваа болест е потврдена на вкупно 22 фарми во Вуковарско-сремската жупанија, соопшти Министерството за земјоделство, пренесе Agroklub.
Отстранет е сомнежот за појава на две фарми, додека првиот случај на зараза кај дива свиња е забележан во месноста Гуња.
Од хрватското Министерство за земјоделство нагласуваат дека се преземени дополнителни мерки за спречување на нелегалната трговија со живи свињи и свинско месо со цел да се запре натамошното ширење на заразата. „Поставени се пунктови со полициски надзор на 8 точки каде што е зголемен ризикот од потенцијален нелегален сообраќај на подрачјето на општините лоцирани во заштитната зона.
Од друга страна, за да се намалат штетите на производителите, Хрватската земјоделска комора побарала Министерството да ги ублажи пропишаните мерки.
„Добиваме бројни барања од одгледувачи кои бараат свињите кои се здрави и спремни за испорака, прегледани од овластен ветеринар, да можат да бидат испорачани во овластени кланици со почитување на сите мерки“, стои во барањето испратено од претседателот на Одборот за одгледување свињи, Антун Голубовиќ.
Покрај горенаведеното, тој посочува дека е неопходно да се дозволи движење на свињите во рамките на контролираните капацитети – од местото на опрасување до просторот за одгледување, од просторот за одгледување во просторот за гоење, како и трансферот на маториците од простор за чекање до местото за опрасување со цел да не дојде до прекин на одгледувањето.
