Месната заедница од струшкото село Вишни и неколку еколошки здруженија реагираат на масовна и, според нив, илегална сеча на шумата на планината Јабланица.
– Сечата добива на интензитет во изминативе месеци во атарите на селата Вишни, Радолишта, Франгово, Лабуништа. Речиси и да нема педа од Јабланица во која не продреле шумските мафијаши. Шумската полиција е немоќна и не реагира, шумското стопанство одамна кренало раце, а највредните букови шуми исчезнуваат и се нанесува огромна штета на екосистемите и на државата, стои во писмото до јавноста на месна заедница село Вишни и здруженијата на граѓани „Св.Спаса Вишенска“, „Св.Атанасие“ и „Екотуризам 2016“.
Посочуваат дека изминатите години биле испратени реакции и претставки до Министерство за земјоделство, шумарство и водостопанство, а добиле одговор од Министерството за животна средина и просторно планирање дека шумско-културни работи ќе се изведуваат само во атарите од селата Радолишта и Франгово, според посебниот план за стопанисување со шумите во ШСЕ Ќафасан – Јабланица во периодот од 2019 – 2028 година.
Бараат од надлежни органи ургентно да ја запрат бесправната сеча и пустошењето на шумските екосистеми на Јабланица.
– Само на тој начин државата ќе може да ги заштити ретките природни богатства од неконтролираното искористување и уништување. Пустошењето и сечењето на шумата е закана од ерозија на земјиштето на планината, а тоа е аргумент плус, зошто државата треба да поведе грижа и да стави крај на ваквата анархија, стои во реакцијата.
Доколку бесправната сеча не престане, најавија стопирање на сите камиони што пренесуваат бесправно исечени дрва на патот Долна Белица – Вишни – Струга.
Фото: Месна заедница – Вишни и здруженијата на граѓани „Св.Спаса Вишенска“, „Св.Атанасие“ и „Екотуризам 2016“.
