Министерот за земјоделство, шумарство и водостопанство Љупчо Николовски вчера имаше средби со производителите на ориз од Кочанскиот регион, на коишто се запозна со проблемите со кои се соочуваат и ги информираше за владините мерки за поддршка.
На средбата со оризопроизводителите, министерот Николовски истакна дека тие постојано добиваат државна поддршка, со редовни и дополнителни финансиски интервенции, а воведени се и низа нови мерки преку програмата за рурален развој.
-Радува што откупната цена на оризот е драстично зголемена, а последните анализи покажуваат дека се движи меѓу 36 и 38 денари за килограм арпа. Од денеска почна исплатата на дополнителната мерка од три денари за килограм предадена арпа и веќе ја добија над илјада земјоделци. Претходно, во февруари беа исплатени сите субвенции за поледелство, вклучително и за оризопроизводство, во износ од 60 милиони евра, што е резултат на најголемиот износ на буџетот за земјоделството досега. За првпат годинава сите земјоделци ќе добијат и 30 отсто авансна исплата, како дел од новиот модел за поддршка, истакна министерот Николовски.
Во врска со најавите за протести и незадоволство на дел од оризопроизводителите министерот Никоиловски оцени дека нема причини за тоа, а таквото однесување на поединци, кои се мотивирани од други причини, претставува злоупотреба на трудот на земјоделците.
