Премиерот Димитар Ковачевски и министерот за земјоделство, шумарство и водостопанство, Љупчо Николовски присуствуваа на Саемот на вино „ВинИтали“ во Верона, Италија, каде што на заедничкиот штанд „Wine vision by Open Balkan“ беа презентирани најквалитетните вина од Северна Македонија, Србија и од Албанија.
„Отворен Балкан е моќна економска иницијатива која дава вистински резултати за луѓето и бизнисите. Со фокус на основните слободи на Европската Унија, слободното движење на луѓе, стоки, услуги и капитал, градиме посилен, попросперитетен балкански регион.
Оваа иницијатива е заснована на принципите на добра волја, и добри меѓусоседски односи меѓу нашите три земји – Северна Македонија, Србија и Албанија. Со тоа што работиме заедно, му покажуваме на светот дека има надеж за подобра иднина за сите во регионот.
Со Отворен Балкан создаваме подобар и полесен живот за нашите граѓани. Заедно, можеме да создадеме европски Балкан – стабилен, просперитетен и полн со можности!“, рече премиерот Ковачевски.
„Отворен Балкан нуди многу можности, со отворени граници без административни процедури, чекања и бариери. Инвестираме во силна промоција на македонското вино. Иницијативата Отворен Балкан е од суштинско значење за економскиот и трговски развој на нашите земји. Заедничкото претставување на најдоброто вино од Северна Македонија, Србија и Албанија вродува со плод и резултат. Нашиот штанд е најпосетен, има најдобри коментари и секако најголема привлечност за љубителите на виното и професионалните купувачи.“, потенцираше министерот Николовски.
