Се гради колекторски систем за поврзување на отпадни води од село Тимјаник до Неготино, информираше денеска неготинскиот градоначалник Горан Стојанов.
– Во завршна фаза е проектот „Заштита на водните ресурси со намалување на човековото влијание врз животната средина“ со акроним „wa-mbrella“, проект преку програмата „Интеррег Ипа програма за прекугранична соработка Грција-Македонија“ и е во насока на заштита на животната средина. Проектот е во завршна фаза, реализирани се сите активности и останата е да се доврши најголемата и највредна активнос, изградбата на колекторскиот систем за поврзување на отпадните води на село Тимјаник со град Неготино, соопшти Стојанов.
Вредноста на проектот е во висина од 314.754,55 евра или 19.514.782 денари.
– Досега се спроведени повеќе активности. Беше реализиран состанок за напредок на проектот, изработен е комуникациски пакет со акции, испечатени се две изданија на промотивни материјали за промоција, одржан е дводневен настан за фармери во општина Неготино. Имаше информативен ден за најдобри иригациони практики во соседна Грција, изработена е техничка документација за продолжување на канализациониот систем на излезот од Неготино во должина од 400 метри, а исто така изработена е и предфизибилити студија за прочистителна станица на реката Вардар, појасни градоначалникот на Неготино.
