Унгарската полиција и инспекторите од Националната канцеларија за безбедност на синџирот на храна биле запрепастени од мачните сцени од илегалната кланица што ја откриле. Хигиенско-санитарните услови биле катастрофални, а на локација која не била ни регистрирана не биле исполнети ни минималните услови за здравје на животните. Во дворот пронашле остатоци од заклани животни, кожа, полураспаднати остатоци…
Сите животни биле незаконски заклани, а преработката и димењето се одвивале, велат од полицијата, во шокантни услови. Увидот е извршен на имот кој се наоѓа во зона со висок ризик од африканска свинска чума. Констатирани се бројни прекршувања на законот во врска со животните кои се чуваат таму (говеда, свињи, овци, живина).
Сопственикот ја немал потребната официјална дозвола или регистрација за производство на храна, немал едно од основните барања за безбедност на месото, а непознатата здравствена состојба на животните претставува епидемиолошки и безбедносен ризик.
Во дворот на кланицата, освен остатоци од распаднати животни, полицијата открила и машина за кубење пердуви, решетка со куки за месо, димница и котел. Машините биле валкани и ‘рѓосани.
Против сопственикот е поведена постапка за повеќекратни нарушувања на здравјето на животните, а пронајдените прехранбени производи веднаш се повлечени од пазарот. Нивната циркулација и употреба е забранета и се ставени под официјална блокада. Постапката и утврдувањето на паричната казна се во тек.
Видеото содржи вознемирувачка содржина
