Училиштето „Ѓорче Петров“ од Кавадарци избира најдобри млади вина произведени од ученици од земјоделската струка. Од средношколскиот училишен центар денеска информираа дека, традиционално, и оваа година се вклучуваат во одбележувањето на месецот на младо вино, ноември, покрај многубројните настани што се организираат во повеќе земји во светот.
– Преку дегустација на млади црвени и бели вина произведени од наши ученици, ние се вклучуваме во светските настани, на свој начин му даваме автентично обележје. Сите наши ученици коишто во теоретската и практичната настава изучуваат како се произведува добро вино, а направиле обиди за свое производство, треба да достават винска мостра, што ќе биде оценувана од посебна комисија составена од стручни лица енолози, појаснија од „Ѓорче Петров” за МИА.
Од училиштето соопштија дека следуваат награди за учениците што произвеле најдобри вина. Доделувањето на наградите ќе биде на 24 ноември, кога ќе има рецитал и музичка програма изведени од ученици, а присутните ќе можат и да дегустираат од младите вина.
– Прославата на младото вино е настан поврзан со една од науките и дејностите кои ги изучува и применува нашето училиште. Дел од нашите ученици токму овде се стекнуваат со првите знаења од енологијата. Некои од нив подоцна студираат енологија. Од овие училишни клупи излегуваат многу добри мајстори за производи од грозје. Без разлика дали се вработуваат некаде, или започнуваат семеен бизнис, нагласуваат од „Ѓорче Петров”.
Мотото на училиштето, е, „денес ученик, утре стручњак”.
