Полска ја тресе скандал во живинарскиот сектор. Полицијата извршила увид во најмалку 66 производствени погони и утврдила дека постојат основани сомнежи дека кокошките, патките и мисирките биле хранети со храна со адитиви и масти наменети за производство на лубриканти, технички масла, биогорива и сл. Консумирањето на такво месо го зголемува ризикот од рак на простата, рак на белите дробови и леукемија, пренесува Wirtualna Polska.
Во јануари годинава беше покрената голема истрага, а има и уапсени кои фалсификувале документи.
Истрагите откриле дека компанија од Познањ, која е специјализирана за продажба на масти, увезувала во Полска технички масни киселини кои вообичаено се користат во хемиската и детергентската индустрија. Стоката била увезена од Русија, Украина, Малезија и Романија. Полската компанија ги фалсификувала сертификатите и ги продавала овие масти како производ што може да се користи во производството на храна. Се чини дека целиот бизнис започнал уште во 2017 година, а таа компанија забележала приходи од продажба на масти од 90 милиони злоти, односно скоро 19 милиони евра.
Во истрагата било утврдено дека увезените производи содржат големи количества пестициди кои освен тумори предизвикуваат и оштетување на нервниот систем. Со долготрајно консумирање на месото од живината која се храни со загадени технички масти, се зголемува ризикот од деменција, Алцхајмерова и Паркинсонова болест.
Значи, оваа маст ја продавале производители на добиточна храна и во никој случај не ги исполнувала стандардите. По извршена полициска проверка, констатирано е дека на увезените масти нема јасно означување дека тие не се за производство на храна.
По „тестирањето“ во лабораторија, компаниите за технички масти добивале лажни сертификати дека може да се користат за исхрана на добитокот. Ги мешале со вистински масти за прехрана и им ги продавале на производителите на храна по поволни цени.
Истрагата се уште е во тек
Обвинителството и Државниот истражен завод одбиле да дадат информации со образложение дека постапката е во тек.
„Истрагата се спроведува во компанија која припаѓа на германска капитална групација која доставувала компоненти за производство на добиточна храна на голем број производители во Европа“, изјавил Дариуш Гошчињски, генерален директор на Националниот совет за живина.
Засега не е познато кои живинарски фарми добиле добиточна храна загадена со масти за производство на лубриканти. Во 2021 година, приходите на четирите најголеми компании што ги посетила полицијата изнесувале приближно 15 милијарди полски злоти или 3,10 милијарди евра. Тестовите на фалсификуваните масла треба да се достават до обвинителството и до Главниот ветеринарен инспекторат.
