Обединетите нации се залагаат за намалување на цените на ѓубривата за да се избегне „идна криза“ во достапноста на стоката, изјави висок функционер на ОН, организацијата што е вклучена во преговорите насочени кон зголемување на извозот на руски ѓубрива, вклучително и амонијак, пишува Ројтерс.
Тие повторуваат дека војната во Украина ја поттикна глобалната прехранбена криза и скокот на цените на овие производи.
„За да спречиме идна криза, мораме да ги намалиме цените на ѓубривата“, изјави за новинарите во Женева генералната секретарка на Конференцијата на ОН за трговија и развој (УНКТАД), Ребека Гринспан.
Русија е еден од најголемите светски добавувачи на поташа, фосфатни и азотни ѓубрива и произведува 13 отсто од вкупната глобална количина. Извозот на овие стоки од таа земја падна за седум отсто во првата половина на 2022 година.
Иако со договорот за коридорот за житарки преку Црното Море, постигнат на 22 јули, е договорено да се рестартираат испораките на земјоделски производи од Русија, таа земја го критикува документот, жалејќи се дека нејзиниот извоз сè уште е отежнат.
Имено, договорот вклучувал амонијак – клучна состојка во азотното ѓубриво. Цевководот што го транспортирал од рускиот регион Волга до црноморското пристаниште Пивденњи во Украина беше затворен кога Русија ја нападна Украина на 24 февруари. ОН се обидуваат да посредуваат во рестартирање на тој извоз.
Но, во меѓувреме, Русија почна да ги анектира украинските региони Доњецк, Луганск, Херсон и Запорожје по таканаречениот референдум, кој Киев и западните влади го осудија како незаконски и присилен.
Гринспан одби да ги коментира преговорите за амонијак, опишувајќи ја ситуацијата за Ројтерс како „премногу чувствителна“.
„Мораме тоа да го коригираме и да ги намалиме цените“, заклучи таа.
