Танкер кој превезува течно ѓубриво од Русија наскоро ќе пристигне во САД, покажуваат извори и податоци за следење на бродовите последниве денови, објави денеска Ројтерс. Во Њу Орлеанс денеска треба да пристигне танкерот „Џони Ренџер“ под либериско знаме со околу 39.000 тони ѓубриво направено со комбинација на уреа, азотна киселина и амонијак.
Ублажување на кризата?
Со овој потег, во време на широко распространета загриженост дека глобалните цени на ѓубривата ќе бидат превисоки, Вашингтон, како што пишуваат, ја ублажува кризата, недостигот и ги ограничува цените на храната.
Станува збор за 39.000 тони раствор на уреа амониум нитрат, натоварен на брод во Санкт Петербург, кој плови кон Њу Орлеанс.
Портпаролот на Стејт департментот нагласи дека САД не санкционирале храна или земјоделски производи од Русија.
„За разлика од руската влада, не е во наш интерес да ја користиме храната како оружје за да создадеме хуманитарна криза што би го погодила ранливото население“, рече тој.
Го прошируваат извозот
Извозот на минерални ѓубрива од Русија би можел да се зголеми. Владата, на барање на Руската асоцијација на производители на ѓубрива (RFPA), ја разгледува можноста за зголемување на бројот на контролни пунктови преку државната граница со цел да го прошири извозот на оваа стока, објави тамошната Национална агенција за рејтинг (NRA).
Руските производители го намалија користењето на балтичките пристаништа во последниве години, а RFPA претходно побара да се дозволи извоз преку пристаништата Темрјук и Кавказ (Краснодарски регион). Капацитетот на Темрјук е 5,8 милиони тони годишно, додека капацитетот на пристаништето Кавказ е 27,5 милиони тони.
RFPA предложи проширување на списокот со вклучување на пристаништето Находка (регионот Приморска), 20 железнички линии и 10 патни контролни пунктови.
