Откако ќе се соберат посевите со ориз, на фарма во провинцијата Након Патом во Тајланд, имаат посебен начин да се ослободат од полжавите кои остануваат на полето по жетвата. Се пушта јато од околу 10.000 патки, кои инстинктивно се упатуваат кон поплавените полиња за да се нагостат со полжавите останати во стрништата од ориз. Тоа претставува традиционално „чистење“ на стрништата.
На спектакуларното видео направено со дрон може да се види како патките брзаат низ малиот отвор кон отвореното поле, а нивниот пат, кој не е ни малку краток, потсетува на природната преселба на птиците.
Овој начин на чување патки во областите за одгледување ориз во таа земја е одамна традиција. Тајланѓаните го нарекуваат „пед лаи тунг“, што значи „бркање патки низ полето“. За оваа цел се користи британската раса Каки Кембел. Тие се носат на оризовите полиња откако ќе поминат 20 дена на фармата. Остануваат на отворено околу пет месеци, а потоа се враќаат на фармата за да произведуваат јајца.
„Придобивката е што ги намалуваме трошоците за хранење на патките“, вели Апиват Чалермклин, одгледувач кој го презел бизнисот од својот татко. „А за возврат, патките им помагаат на земјоделците да се ослободат од полжавите и инсектите на полињата, за да можат да ја намалат употребата на хемикалии и пестициди.“
Апиват има четири јата кои се движат низ различни оризови полиња во провинцијата.
Како изгледа оваа глетка погледнете во видеото:
