Приказната за брачниот пар Милан и Нада Ѓуповац, кои пред 5 години одлучиле во селото во околината на Шабац да изградат старинска и здрава куќа од слама и кал и таму од градот да се преселат со своите деца, ја воодушеви Србија, како и целиот регион.
Милан и Нада до пред пет години живееле во центарот на Шабац и имале свој стан. Велат дека многу им пречел градскиот живот, вревата, кафулињата и сообраќајот. Потоа дошле до идеја да изградат стара куќа во блиското село, по примерот на куќите што биле пред сто години – од кал и слама. Нада по професија е фармацевт, додека Милан е професор по физичко образование. Тие живеат во оваа куќа со уште три деца, а се вселиле во неа во 2018 година.
За нив овој тип на куќа е многу поздрав и сега живеат таму со своите деца. Многумина ги интересира како изгледа внатрешноста на оваа куќа.
Куќата има околу 120 метри квадратни и интересно е што целата куќа ја изградиле рачно овој брачен пар и нивните блиски пријатели. Нејзината изградба чинела дваесет илјади евра, а почнале да ја градат пред пет години.
Секој што ќе влезе во нивната куќа прво забележува дека во неа лесно се дише, а првиот впечаток е дека покрај тоа што е изградена од природни материјали, има и свеж воздух кој минува низ ѕидовите.
Се греат на дрва, сонцето им дава струја, а водата доаѓа од бунарите
Добиваат струја од сончевата енергија, преку соларни панели. Има и колектори за загревање на водата во болјерот. Водата им доаѓа од бунарот. Се греат на дрва, на печка налик на ракета, која е изградена по нацрти на организацијата „Узуме“ од Франција. Изолацијата е добра, а како што велат до средината на февруари годинава потрошиле само три метри кубни дрва. Немаат телевизор, но имаат компјутер и интернет. Храната ја подготвуваат во шпорет на дрва и на шпорет на гас.
Не плаќаат сметките бидејќи немаат сметки
-Не жалиме за градот. Но, на пример, кога користите соларни панели, не можете постојано да имате струја, односно не можете да вклучите десет уреди одеднаш. Неопходно е да направите распоред на активности, но тоа не ве чини ништо. Имаме и батерии кои акумулираат струја, па создаваме залихи и за 15 дена. Животот на село и во природа е пријатен, рано стануваме, а во зима легнуваме порано. Со таквиот начин на живот биолошкиот часовник се движи и се усогласува. Нормално е луѓето во градот да легнуваат подоцна бидејќи сè свети до полноќ и подолго – се согласуваат Милан и Нада, пренесуваат српските медиуми.
Дел од плацот од 11 хектари го посветиле на градината, а планираат да купат кокошки и една коза. Децата се навикнале на животот на село, на чист воздух, на престојот на имотот. Најстариот син оди во селско училиште. Нада вели дека целта им била да ги навикнат децата на природа, на шума, на здравје.
