Војната во Украина ќе го предизвика „најголемиот стоковен шок“ од 1970 година, објави Светската банка. Анализата предвидува дека нарушувањето поради војната во Украина ќе доведе до зголемување на цените на речиси сите производи – од гасот до житарките и памукот.
Зголемувањето на цените ќе има многу големи економски и хуманитарни последици и ќе доведе до огромни нарушувања, а домаќинствата ширум светот ќе ги почувствуваат, изјави за Би-Би-Си коавторот на извештајот Питер Најџел.
Анализата посочува дека енергенсите ќе поскапат за повеќе од 50 отсто, што во голема мера ќе ги зголеми сметките и на домаќинствата и на бизнисмените.
Најголемо поскапување се предвидува за потрошувачите на гас во Европа, кои годинава ќе плаќаат двојно повеќе за овој енергенс, а пад на цените се очекува следната и во 2024 година, но и тогаш гасот ќе биде најмалку 15 отсто поскап отколку во 2021 година.
Сведоци сме на најголемото двегодишно поскапување на енергенсите од 1973 година, кога цената на нафтата драстично се зголеми поради тензиите на Блискиот Исток, соопшти Светска банка.
Русија во моментов ја снабдува Европската Унија со 40 отсто гас и 27 отсто нафта, а одлуката на европските земји да се откажат од снабдувањето со руски енергенси доведе до значително зголемена побарувачка на други места и автоматски до зголемување на цените.
Светска банка предупредува дека цените на храната ќе бидат значително зголемени, а во податоците на Обединетите нации наведуваат дека индексот на цените на храната е највисок откако почнал да се спроведува пред 60 години.
Се предвидува дека поради недостиг на производи од Русија и Украина, пченицата ќе поскапи за 42,7 отсто, јачменот за 33,3 отсто, сојата за 20, маслото за 29,8 отсто и пилешкото месо за 41,8 отсто.
Украина и Русија пред оваа војна учествуваа во светскиот извоз на пченица со 28,9 отсто, а во извозот на сончогледово масло со дури 60 отсто.
Се додава дека недостатокот на пченица на светскиот пазар е најтешко да се компензира, особено што лошите временски услови во Северна Америка и Кина дополнително ќе ја влошат состојбата годинава.
