Украинските земјоделци до денес посеале околу 400.000 хектари со различни пролетни земјоделски култури, или за една десетина повеќе отколку до 1 април минатата година, и покрај рускиот напад, изјави заменик-министерот за земјоделство Тарас Висоцки.
Недостатокот на гориво не влијаел на сеидбата, рекол Висоцкиј за локална телевизија, додавајќи дека владата „преговара со добавувачите за да не запре сеидбената кампања“, пренесува Ројтерс.
Британската агенција потсетува дека претставниците на украинското Министерство за земјоделство во претходните изјави за Ројтерс рекле дека површините под пролетни култури во 2022 година би можеле да бидат повеќе од преполовени во споредба со минатата година, на околу 7,0 милиони хектари во однос на 15 милиони хектари колку што се очекувало пред војната.
Тие тогаш предупредија дека земјоделците може да ја намалат површината засеана со сончоглед и пченка, но и да ја зголемат површината под јачмен, овес или грашок…
Од почетокот на рускиот напад, Украина го запре извозот на ‘рж, овес, просо, хељда, сол, шеќер, месо и добиток, а воведе и издавање дозволи за извоз на пченица. Владата соопшти дека, сепак, ќе дозволи слободен извоз на пченка и сончогледово масло.
Висоцкиј вели дека Украина на крајот на март има на залиха 13 милиони тони пченка и 3,8 милиони тони пченица.
Новиот украински министер за земјоделство, Микола Солскиј, минатата недела изјави дека залихите на житни култури за извоз изнесуваат 7,5 милијарди долари, но не ја прецизира расположливата количина.
Глобалните цени на храната ќе продолжат да растат доколку ситуацијата во Украина не се промени по нападите, додаде Солскиј, пренесе Ројтерс.
