„Секаде каде што е можно, ќе сееме и ќе садиме“, ја потврдува Олександр Журавел решеноста на украинските земјоделци да помогнат во одбраната на земјата со обезбедување доволно храна. Овој сопственик на семејна фарма, но и висок советник на Организацијата за храна и земјоделство на Обединетите нации (ФАО), живее во малото гратче Хлобине, во близина на неговиот роден град Кременчук. Станува збор за централна Украина, покрај реката Днепар, на половина пат помеѓу Харков и Киев, градови кои денеска се на удар.
Иако оваа област досега не е зафатена од воените дејствија, поради воздушните напади на руските сили, крајно е опасно да се движи по автопатот што води од овој град, па снабдувањето со суровини е отежнато. Дополнително, голем проблем за целата држава се затворените поморски пристаништа со најголем промет на стоки.
„Првиот најголем проблем е недостигот на гориво. Луѓето подготвија семиња и ѓубрива оваа есен и зима, така што има доволно. Второто прашање е што ќе биде со заштитната опрема, дали ќе можеме да набавиме хербициди, инсектициди“, опишува Олександар во телефонски разговор со редакцијата на Agroklub за ситуацијата на теренот.
Третиот голем проблем што ги мачи е ликвидноста, односно парите. Многу земјоделци сеидбата ја започнувале со помош на кредити, што денес е невозможно, бидејќи поради ризикот сите сакаат готовинско плаќање.
Подготовки за сеидба, надеж за жетва
„Сигурно нема да биде лесно и има стравови, но ние сме подготвени да направиме сѐ што можеме во моментов. Се подготвуваме за пролетна сеидба и се надеваме дека ќе успееме да ја завршиме жетвата“, вели Журавел, кој одгледува на сопствените четири хектари аспарагус.
Покрај оваа градинарска култура што ја произведува на својата фарма, во Хлобине, изнајмил и 1.000 хектари земја за да се посее со пченка, пролетна пченица, соја, а дел со цвеќе. Кога станува збор за зимските култури, тој гордо вели дека успеале да ги прихранат со азотни ѓубрива.
На Фејсбук ја отвориле и групата „Агри дискусионски клуб“ на Фејсбук, осмислена како заедница на луѓе вклучени во украинското земјоделство.
„Сите сме различни, но амбициозни и се стремиме кон знаење. Знаеме и дека секоја промена во светот или земјата започнува од нас самите“, е мотото на групата.
Извор: Agroklub
