Палењето на стрништа има низа негативни последици, а покрај тоа забрането е со закон е и строго казниво. Но колку нашите земјоделци всушност водат сметка за тоа?
Оваа пракса има низа негативни последици кои нашите земјоделски производители не ги знаат или пак намерно ги занемаруваат. Со палење на стрништа доаѓа до долготрајно уништување на земјиштето, особено ако се изведува секоја година. Се убиваат корисните микроорганизми во земјиштето, кои се важни за рамнотежа и создавање на хумус. Покрај тоа, оганот од нивата може да се прошири и да предизвика пожар од поголеми размери.
Освен тоа тоа е строго казниво и со закон е забрането.
За прекршителите се предвидени парични казни во склад со законот , во зависност дали се работи за физички или правни лица и достигнува до 500 евра во денарска противвредност. Во последниов период беа зачестени појавите на палење на стрништа и слама кое особено е изразено по попладневните часови.
Податоците кажуваат дека секоја година горат површини со обработливо земјиште чиј причинител е најчесто човечкиот фактор, односно неконтролираното палење.
Инспекторите од ДИЗ ги зачестија контролите на терен, особено во регионите каде постои потенцијална опасност од палење на стрништата на земјоделските површини. Од таму најавуваат интензивни контроли на терен и во наредниот период, со цел справување со аерозагадувањето.
