Заврши кинеската Нова година, позната и како Пролетен фестивал, а со тоа и побарувачката на свинско месо во Кина. Веднаш по 1 февруари, кога се одржа националниот празник, цените на живите свињи на терминскиот пазар во Далиан паднаа на 12.500 јуани по тон жива тежина (1.650 евра/т). Тоа е најниската вредност од претходното рекордно ниско ниво во септември минатата година, наведува Agararheute.
Во споредба со истиот период во 2021 година, тие се дури 60 отсто пониски, што ги загрижува големите тамошни компании кои одгледуваат свињи, кои инвестираа милијарди долари во големи погони, облакодери од 12 ката за одгледување на овие животни, а сега ги бројат загубите.
Влијание на светскиот пазар
Негативното влијание од ваквата состојба ќе се почувствува и на светскиот пазар, особено на оној во Европската Унија, кој бележи и пад на откупната цена на свињите и акумулација на залихи, а дополнително ќе го намали и увозот. Тоа е веќе ограничено со фактот дека Кина строго се заштитува од африканската свинска чума.
Фактот што Италија забрани бројни активности на отворено во два нејзини региони во февруари покажува колкаво влијание има врз земјите извознички, со цел да се спречи ширењето на инфекцијата и можна забрана за извоз. А кога болеста се појави во Германија во 2020 година, Кина го забрани увозот на свинско месо од таа земја, што доведе до големи турбуленции на пазарот.
Ги „билдаат“ државните резерви
Бидејќи кинеското производство на свинско месо нагло закрепна по Африканската свинска чума, а понудата продолжи да расте, треба да се очекува дека цените ќе продолжат да паѓаат дури и по Пролетниот фестивал. Тамошните власти на 8 февруари соопштија дека собираат резерви од свинско месо за државните резерви.
Во 2020 година во Кина се произведени околу 41,13 милиони тони свинско месо, што е мало намалување во однос на околу 42,6 милиони тони во 2021 година, наведува Statista. Свинското месо сочинува околу 56 отсто од целата кинеска месна индустрија. Тоа е убедливо најпопуларниот и најконсумираниот вид на месо во исхраната. Домашната потрошувачка по жител во просек надминува 30 килограми.
