Дебарското јавното комунално претпријатие „Стандард“, коешто стопанисува со водоводот Росоки-Дебар, ја обнови дозволата за користење на водата од изворот во село Росоки.
– По неколкумесечна посветеност успеавме да ја обновиме дозволата за користење на водата од изворот Росоки за град Дебар. Од изградбата на водоснабдувачкиот систем во 1987 година, дозволата за користење вода важеше до 2017 година. По овие години без дозвола, во 2021 година, започнавме процедура за обновување на употребната дозвола, по комплицираната подготовка на документација го добивавме стратешкиот документ од особено значење за нашето претпријатие како и за целиот град Дебар, изјави Бурим Каба, директор на ЈКП „Стандрад“.
Оценува дека обновувањето на дозволата за користење вода е важно бидејќи се прави за првпат од времето на поранешна Југославија.
Дозволата е добиена од Министерството за животна средина и просторно планирање – Управа за животна средина, во која стои дека се однесува на користење на вода од изворот Росоки, каптажа 105 катастарска општина Росоки за водоснабдување на градот Дебар и околните населени места.
Водоводот Росоки-Дебар изграден 1987 година, со зафаќање вода од кај село Росоки, областа Мала Река, во должина од 23 километри. Од него со вода за пиење се снабдуваат Дебар, дел од Центар Жупа, од кракот кој се одделува кај Мелнички Мост, како и селата Долно Косоврасти и Рајчица, низ кои минува цевководот.
Извор: МИА
