Во Холандија има сѐ поголем број фарми на кои живината се заразила со многу заразниот сој на птичји грип. Министерството за земјоделство вчера соопшти дека во провинцијата Норд Холанд, на северот на земјата ќе треба да бидат убиени околу 170.000 кокошки. Околните живинарски компании во областа ќе бидат затворени додека не се спроведат тестови за вирусот Х5Н1 за да се утврди дали тој се проширил.
Само неколку часа подоцна беше објавено дека вирусот избувнал на друга фарма, но во јужната провинција Норд Брабант, каде што ќе бидат убиени околу 46.000 кокошки.
Заразени повеќе од 1,2 милиони птици
Вкупниот број на убиени птици од почетокот на епидемијата во Холандија надминува 1,2 милиони, пренесува Dutchnews. Досега болеста е идентификувана на 18 фарми.
За прв пат беше откриен во октомври минатата година, а му претходеа извештаи за зголемување на угинати диви птици.
Се преземаат мерки за спречување на ширењето на болеста, што подразбира задржување на целата живина во затворен простор. Строги ограничувања има и за нивниот транспорт, но и за ракување со отпадот што го произведуваат.
По глава на жител годишно јадат по 23 килограми
Според порталот Статиста, меѓу 2010 и 2020 година, производството на живина во Холандија се зголемило, достигнувајќи 1,12 милиони тони во 2020 година. Таа година, нешто помалку од 640 компании одгледувале бројлери, а заедно држеле околу 50 милиони едински. Во последната деценија живинарската индустрија во Холандија значително порасна. Но, бројот на компании се намали, а останатите презедоа повеќе животни по фарма.
Сепак, се предвидува дека производството ќе стагнира и ќе достигне нешто повеќе од еден милион тони во 2025 година.
Месото од живина е второ најпопуларно во Холандија, по свинското. Во 2019 година, потрошувачката по жител била нешто помала од 23 килограми, што е повеќе од потрошувачката на говедско, телешко, овчо, козјо и коњско месо заедно. Потрошувачката на свинско месо била околу 37 килограми по човек годишно. Вкупно, Холанѓаните консумирале околу 78 килограми месо по глава на жител во 2019 година.
Според Евростат, најголемото производство на пилешко месо е во Полска и изнесува 2,7 милиони тони и сочинува 19 отсто од вкупното производство на ЕУ. Потоа следат Шпанија (12,6%), Франција (12,3%), Германија (11,9%) и Италија 10,2%), пренесува Agroklub.
