Постојат собни растенија, кои ги има речиси во секоја куќа, но, многумина дури и не ги знаат нивните имиња, дури ни како соодветно да се грижат за нив. Едно од тие собни растенија е спатифилум. Се верува дека ова растение ѝ носи среќа на неговата сопственичка и дека е одговорно за женската благосостојба, па затоа уште од минатото се нарекува женска среќа.
Во минатото постоеле верувања дека ако ѝ дадете спатифилум на немажена девојка, таа наскоро ќе си го среди својот личен живот. Ако го дадете на мажена госпоѓа – во семејството ќе се појави дете. Всушност, сите собни растенија симболизираат нешто специфично – некои среќа во брак, други – пари, трети – здравје, успех и така натаму. Но, зошто спатифилумот се смета за женски покровител?
Од античко време, жените почнале да забележуваат дека постоењето на оваа прекрасна билка во куќата, задолжително повлекува добри промени, особено во љубовните врски. Девојките го наоѓале својот избраник, девојките во врска – набрзо добивале предлог за брак, а мажените жени – живееле среќен брачен живот.
Среќата исто така доаѓала и во куќата на жените кои долго време се обидувале да забременат, а со појавата на ова растение конечно се израдувале од веста за долгоочекуваниот радосен настан.
Многу подоцна, верувањата поврзани со ова растение станале широко познати.
Жените, кои веќе ја доживеале среќата, им носеле коренче на своите помалку среќни другарки, за и тие да ја доживеат магичната моќ на ова растение.
Денес „женската среќа“ е еден од најраспространетите и најомилените подароци за понежниот пол. Ако ништо друго, го разубавува просторот во кој живееме, а секако пријатната атмосфера во домот води и до позитивно расположение, не само за жените, туку и за сите членови на семејството.
