Неопходно е да се забрани употребата на диви животни во циркусите низ ЕУ, се согласија европратениците, разговарајќи за негативните последици за животните и луѓето кои произлегуваат од овој вид „забава“.
Европратениците во дебатата за можна забрана за користење на дивиот свет во циркусите, на пленарна седница, се согласија со повикот за забрана низ Европската Унија.
Михаела Шојдрова (ЕПП) рече дека повеќе од милион граѓани на ЕУ ја потпишале петицијата за забрана. „Мило ми е што во 23 земји членки ова прашање е веќе решено“, рече таа.
Само три европски земји (Грција, Кипар и Малта) целосно ја забрануваат употребата на диви животни во циркусите.
Европскиот комесар за управување со кризи Јанез Ленарчич смета дека ова е етичко прашање. „Онаму каде што законодавството не е усогласено на ниво на Европската Унија, земјите членки имаат можност да ги преземат неопходните чекори“, рече тој.
Тој ги повика државите кои немаат законска забрана да го следат примерот на оние што ја вовеле, но бил експлицитен дека тоа не треба да се бара на ниво на ЕУ.
Дивите животни кои се користат во циркусите не се припитомени, туку скротени, се согласиле говорниците. Докажано е дека тоа е несоодветна средина за нив бидејќи циркусите не успеваат да им ги обезбедат некои од најосновните социјални, просторни и здравствени барања.
Нивната способност да се однесуваат природно е сериозно загрозена. Дополнително, од нив се бара да вршат голем број акции несвојствени за нив. Како резултат на тоа, благосостојбата на животните, здравјето и репродукцијата се значително намалени.
„Замислете да живеете во кафез, веројатно родени како затвореник, но ја чувствувате дивината во себе. Копнеете слободно да трчате или да пливате и да спиете на отворено. Но, вашиот секојдневен живот не изгледа така. Денот ви е во милост на луѓето кои ве држат заробени, каде што треба да научите како да избегнете болни казни“, рече Тили Мец (Зелени/ АЛЕ).
Повеќето пратеници сметаат дека употребата на диви животни во циркусите нема никаква образовна или културна вредност, туку, напротив, може негативно да влијае на јавната перцепција за дивите животни и почитта кон нив.
Едно од многуте прашања се здравствените контроли поврзани со нивното преместување меѓу државите. Студиите покажуваат дека спроведувањето на контролите на здравјето, трговијата и поседувањето на диви циркуски животни не е лесно. Пратениците спомнале и поголем ризик од пренесување на зоонози.
Исто така, употребата на загрозени видови ги поткопува меѓународните напори да се запре нелегалната трговија и ловокрадството.
Бидејќи циркусите поминуваат многу време во движење и често ги менуваат имињата, тешко е да се следи животот на заштитените животни кои се одгледуваат во заробеништво. Ова ја олеснува нелегалната трговија со загрозени видови и нивни делови во рамките на ЕУ, со што се загрозува ефективното спроведување на прописите за трговија со диви животни.
Покрај тоа, употребата на дивиот свет во циркусите често резултира со несреќи во кои се вклучени скротувачи и други вработени во циркусот, како и публика. Несреќите се предизвикани од девијантно однесување предизвикано од лошите услови за живот и стресот, велат европратениците.
Забраната ќе обезбеди дека изложеноста на ризиците од нелегалната трговија со диви животни и ризиците за јавното здравје и безбедност се подеднакво ублажени во сите земји-членки, велат пратениците.
