Деветнаесетгодишниот Душан Недовиќ од српското село Јасеново деновиве има полни раце работа на својот имот.
„Пред две години почнав да сеам компир во поголеми количини. Родот ме изненади оваа есен, со оглед на тоа што летото беше без дожд. Претходните неколку сончеви денови ги искористив полека да ги подготвувам компирите за пазар. Само што почнав да вадам, но очекувам да имам близу 10 тони. Слушнав дека цената на компирот годинава ќе биде 50 динари, што би ни помогнало на сите нас кои го одгледуваме овој зеленчук“, изјави овој млад земјоделец, пренесуваат српските медиуми.
Сведоци сме дека работата на земјоделците е исклучително тешка, но добрата цена на производите на пазарот овозможува многу млади земјоделци да ги прошират своите посеви. Многу млади луѓе одат во градовите во потрага по работа, но тоа не е случај во селата меѓу Златар и Муртеница. Повеќето млади луѓе останаа овде на своите огништа и се занимаваат со земјоделство.
„Кај нас се произведува најквалитетен компир и затоа ги користам благодетите што ни ги дала природата. Отсекогаш сум го сакал животот на село и затоа имав јасни планови за иднината. Годинава го завршив Земјоделското училиште во Пожега, а потоа се вратив во родното село. Имам проширени насади со малини и компири, а се занимавам и со сточарство. Мајка ми најмногу ми помага во земјоделските работи, а по потреба ангажираме и работници“, вели Душан.
Душан вели дека ако останат повеќе млади во селото, на сите ќе им биде подобро. Тој веќе ги полни визбите и магацините со овогодинешниот род на компири, а се надева дека до следната сезона ќе се испразнат по поволна цена.
