Во Делчево продолжува изградбата на нова патна инфраструктура. Со последната активност, како што информираат од Општината, беше опфатена улицата „Скопска” во населбата Ново Делчево каде во должина од 250 метри заврши асфалтирањето на оваа улица.
-Во оваа населба се работи и на реконструкција на улицата „Орце Николов“ во должина од 500 метри со изградба на тротоари, а ќе следува и реконструкција на дел од улицата „Острец“ во должина од околу 50 метри со изградба на потпорен ѕид и тротоари, кој претставува црна точка во сообраќајот, информираа од Општината.
Поради изведувањето на градежните работи на овие сообраќајници се применува времен режим на сообраќај.
-Во таа насока потсетуваме дека градежните работи на улицата „Орце Николов“ ќе се изведуваат во фази, поради што ќе бидат затворени за сообраќај делници од улицата, но ќе биде дозволено движење по обиколни улици, за што е неопходно почитување на поставената сигнализација и опрема, додадоа од Општина Делчево.
Деновиве, како што дополнија, започна и изградбата на локалниот пат Делчево-Тработивиште, а се вршат подготвки наскоро да започнат и градежните работи за реконструкција на ул „Острец“ и изградбата на потпорниот ѕид.
Извор: МИА
