Надалеку познатите извори на минерална вода во село Свињишта, Кичевско, кои секојдневно се посетени од десетици жители како од Кичевијата, исто така речиси и од сите делови од западниот дел на Македонија, нагрдени се од ѓубрето кое во нивна непосредна близина го фрлаат неодговорните посетители.
Повеќето граѓани што ги посетуваат овие извори полнат минерална вода во големи количества и се грижат за околината. Но, не е редок случајот на посетители, кои од само на нив познати причини, фрлаат пластични шишиња, кеси и се што не им е потребно и ја нагрдуваат околината крај самите извори.
– Иако повеќето посетители на изворите се грижат за хигиената на самото место, но има и такви кои без посебна причина шишињата што не им се потребни, најлон кеси и друг отпад што го имаат кај себе ги депонираат кај самите извори. И така наместо чиста околина, прекрасните извори со минерална вода ги нагрдуваа оваа слика создадена од неодговорни посетители. Бидејќи во нашето село немаме комунално претпријатие, ѓубрето никој не го чисти и затоа депонијата од ден на ден е се поголема, нагласи Миле, постар жител на село Свињишта, кој истакна дека секојдневно доаѓа на изворот и полни вода толку колку што му е потребна за 24 часа.
Од грдата слика крај самите извори се разочарани поголемиот број посетители така еден намерник од реканскиот, истакна дека е жалосно овој бисер на природата да се нагрдува од човечка рака.
– Наместо сите ние да се грижиме околината на изворите со минерална вода да ја разубавиме, поединци доаѓаат и фрлаати се што не им е потребно. Ова е можно само кај нас и никаде на друго место, бидејќи овие лековити извори наместо сите да ги чуваме, на поединци воопшто не им е важно дали нивната околина ќе биде уредена или не, вели Андреј Данилоски, жител од реканскиот крај.
Сите што тука доаѓаат прво што им паѓа в очи се депониите создадени на неколку метри од изворите.
Извор: МИА
