Минатата недела на светските берзи цените на пченицаата паднаа, а на пченката пораснаа. Оваа недела се бележи пад за двете култури. За тоа придонесе последниот извештај на Министерството за земјоделство на САД (USDA), според кој глобалното производство на пченица би требало да се зголеми за 5,46 милиони тони до нов рекорд од 794,44 милиони тони. Ова е главно резултат на поголемо производство во Европската Унија, Русија и Украина.
Што се однесува до ЕУ, прогнозата е зголемена за 3,5 милиони тони, на 137,5 милиони тони, поради неодамнешните дождови во северна и централна Европа. Најголем раст е забележан во Германија, Франција и Романија.
Индексот на вегетација (НДВИ) измерен со сателити покажува зголемување на површината на одгледување пченица во Европа. Германија овој месец забележала најголем раст од 1,3 милиони тони, на 22,9 милиони тони.
Се проценува дека во Франција се зголемени прогнозите за приносот за 0,8 милиони тони на 37,5 милиони тони. Во Романија, која имаше многу поволни временски услови за раст на земјоделските култури, се очекува приносот да се зголеми за 0,5 милиони тони на 9,2 милиони тони. Раст од 0,3 милиони тони бележи Литванија, а 0,2 милиони тони Полска и Бугарија.
Како се движат цените?
Жетвата на пченицата во Русија може да биде поголема од минатата година, смета УСДА. Истото важи и за Украина. Ако тоа навистина се случи, аналитичарите сметаат дека европскиот пазар ќе биде под значителен притисок во цените. Цените за пченицата на берзата во Чикаго минатата недела пораснаа на 219,08 евра по тон, а на париската берза 211,25 евра. Цената на оваа земјоделска култура на МАТИФ падна на 209 евра за тон.
Што се однесува до руското производство, жетвата таму е зголемена за еден милион тони на рекордни 86 милиони тони. Производството на зимска пченица таму се зголеми во целиот западен дел на земјата поради пролетните дождови. Овој очекуван принос е нивен рекорд во последните пет години.
Глобалната потрошувачка на пченица ќе се зголеми за 2,4 милиони тони на рекордни 791,1 милиони тони, главно како резултат на употребата за исхрана на стоката во ЕУ и Русија. Сепак, Кина е исто така голем потрошувач и се предвидува дека од вкупно 296,8 милиони тони од залихите, дури 48 проценти ќе бидат во таа држава.
Според извештајот на УСДА, светската жетва на пченка во претстојната сезона ќе изнесува историски 1.189,85 милиони тони, што е зголемување за 5,8 проценти во однос на минатата сезона. Меѓу најголемите производители во ЕУ, поголема жетва се очекува во Романија, Унгарија и Полска. Франција може да забележи пад, а во Италија ситуацијата останува иста како и минатата година.
Цената на пченката на берзата во Чикаго падна во споредба со претходната недела на 214,13 евра за тон, додека тон на EuroNext чини 261 евра.
Извор: agroklub.com
