Ненадејниот мраз, најлош во последните неколку децении, ја опустоши француската индустрија за вино, која веќе се бори со ефектите од коронавирусот и тарифите наметнати од САД на нивните вина во октомври минатата година.
Лозарите од Бордо до Бургундија запалија свеќи (метални контејнери исполнети со восок), слама и како што пишува Декантер, дури и хеликоптери користени за циркулација на потопол воздух летаа над лозјата, сето тоа за да ги заштитат лозовите насади од ниски температури. И покрај нивните напори, има извештаи за сериозни штети на насадите низ целата земја.
Според Витисфер, 50 проценти од пупките биле оштетени, што е тежок удар за тамошните производители. Температурите во повеќето региони се движеле од -5 до -6 степени Целзиусови, а во општината Сант-Сесил-ле-Вињ е измерена од -9 степени. Уништени се лозови насади во долината Рона, Лоара, областа Бордо и провинциите Бургундија и Шампањ.
„Мразот погоди 80 проценти од француските плантажи“, изјавил Жан-Мари Барилер, претседател на Францускиот национален комитет за вина со контролирано географско потекло (CNIV).
Малку поблаги температури имало во источните предели на Пиринеи, додека помала штета е проценета во провинцијата Алзас. Но, според понатамошната временска прогноза, француските производители сè уште можат да очекуваат мраз.
Една од карактеристиките на климатските промени е поголема фреквенција на екстремни временски прилики, а од почетокот на студениот бран беше јасно дека се случува нешто невообичаено. За време на викендот, земјата сфати дека станува збор за природна катастрофа што се случува еднаш во половина век и дека тие останаа без голем дел од овогодинешните приноси.
Земјоделската комора во Франција отвори кризна единица за поддршка на земјоделците со што беа преземени многу мерки за да им се помогне на винариите како ослободување од плаќање придонеси за социјално осигурување. Укината е и кризната дестилација.
Извор: Agroklub
