Француските земјоделци минатата недела протестираа против реформата на Заедничката земјоделска политика на Европската Унија (ЗПП). По насилствата и инцидентите, како што пишува agrarheute, лутите земјоделци не се откажуваат. Во раните утрински часови во петокот колона трактори се упати кон Тулуз, забавувајќи го и заглавувајќи го сообраќајот на патиштата и обиколниците. Го прекинале сообраќајот на еден од автопатите фрлајќи тракторски гуми, пишува actu.fr.
Се одржаа протести и во Бурж, каде што се собраа 300 до 400 земјоделци пред зградата на Регионалната управа за животна средина и просторно планирање (Дреал). На нивните трактори висеа постери на кои пишуваше „Спаси го својот земјоделец“ или „Макрон, не прави глупости – изборите ќе дојдат наскоро“.
Тие беа повикани на протест од Францускиот синдикат на земјоделци (FNSEA) и земјоделците од Jeunes (ЈА, млади фармери), кои организираа протести во градот Клермон-Феран минатиот месец, кога земјоделците расфрлаа ѓубриво низ целиот град, возеа трактори, рушеа бандери за осветлување и се расправаа со полицајците, а некои беа и уапсени.
Ни минатонеделните протести не поминаа мирно. Учесниците во протестот палеле гуми, бали слама, расфрлале ѓубриво, со што продолжија да вршат притисок врз владата и да бараат избалансиран и фер ЗПП.
Сточарите најмногу се плашат од ЗПП?
Сточарите најмногу се плашат од ЗПП затоа што сметаат дека реформата за која се преговара во моментов ќе резултира со значителни финансиски загуби.
„Според нашите проценки, со оваа реформа ќе изгубиме околу 80 евра по хектар, што е 52 милиони евра за земјоделството во регионот Центар-Вал де Лоара“, предупреди Франк Лепретре, претседател на FNSEA. Тој исто така стравува дека многумина нема да можат да продолжат да се занимаваат со земјоделство поради еколошките прописи што им се наметнати. Инсистираат на ЗПП која е насочена кон малите производители, а не кон големите компании. Протестираат и против предлог-законот за оданочување на вештачките азотни ѓубрива.
„Ако не преземеме ништо, ќе изгубиме од 25 до 30 проценти од приходите“, изјавил Жан-Франсоа Ламасе, од FNSEA. „Ни наметнаа ЗЗП ветувајќи компензациска поддршка, а денес и неа ја отстрануваат. Од 2007 година изгубивме во просек помеѓу 160 и 169 евра по хектар. Не можеме да произведуваме по оваа цена“, предупредува тој и додава дека ова е крај на руралниот живот во Франција.
„Ќе јадете фалсификувана пченица од Канада, зеленчук одгледуван под антибиотици од Холандија, шпански производи со хербициди забранети во Франција …“, огорчено порача Ламасе.
Францускиот ресорен министер Џулиен Денорманди е под сè поголем притисок поради преговорите во Брисел, а земјоделците бараат од него да не прифаќа понатамошни отстапки што се на штета на нив. Тој им возврати со поддршка во објава на Твитер, во која пишува дека не би имало силна земја без такво земјоделство и дека треба да се има храброст да се финансира домашното земјоделство по фер цена.
Извор: agroklub
