Ивес Адамс, фотограф специјализиран за дивина и диви животни направил фотографија за која верува дека е единствена. При двомесечната експедиција на Антарктикот патот го донел до островот Јужна Џорџија, каде што го исполнил својот сон и фотографирал нешто што дотогаш не било видено.
Додека пловеле по океанот околу островот забележале колонија од околу 150 илјади пингвини, што изгледало доволно добро и примамливо за Ивес, кој посегнал по својот апарат. И додека го подготвувал објективот и барал најдобар агол, вниманието му го привлекла жолта точка која се истакнувала во црно белите бои.
„Никогаш не сум видел жолт пингвин, во колонијата од над 150 илјади пингвини сите изгледаа нормално и складно, но во моментот кога го здогледав жолтото одело знаев дека ја имам вистинската работа. Беше тоа неверојатно искуство и мило ми е дека токму јас сум автор на првата фотографија на жолтиот пингвин“, изјавил Ивес Адамс.
Причината што овој пингвин е поинаков од другите лежи во тоа што неговите клетки повеќе не создаваат меланин, па неговите црни пердуви стануваат жолтеникави и со кремаста боја.
„Имавме среќа што можевме да дојдеме сосема близу до него. Имавме непречен кадар и можевме да направиме одлични фотографии. Инаку, во ситуација кога на купче имате толку пингвини, невозможно е движење по островот, но и тоа успеавме да го изведеме и се приближивме најмногу што можевме“, изјави член на тимот на Адамс, кој бил сведок на оваа сензација.
