Европската Унија планира да воведе промени во начинот на обележување на потеклото на прехранбените производи со цел, овие информации да станат потранспарентни и да можат потрошувачите подетално да се информираат за одреден производ.
Европратениците во Комитетот за внатрешен пазар и заштита на потрошувачите на Европскиот парламент вчера разговараа за предлогот, кој е дел од стратегијата на ЕУ „Од поле до маса“ и рекоа дека квалитетот на храната, подолго време е препуштен на интересите на пазарот, а на штета на квалитетот на храната, потрошувачите и животната средина.
Своето мислење го искажаа и хрватските пратеници Билјана Борзан и Томислав Сокол, кои се известувачи на нивните пратенички групи во комитетот за оваа стратегија – социјалдемократите и народот.
Борзан истакна дека стратегијата ќе донесе значителни промени во начинот на обележување на храната и предупреди на можноста за манипулирање со ознаките за потекло на состојките.
„Стратегијата предвидува промени во системот за етикетирање на потеклото на храната, во кој има пропусти, за кои верувам дека дозволуваат сомнителни практики за маркетинг. На пазарот наоѓаме производи чија амбалажа „вреска“ домашно, хрватско, славонско итн, а главните состојки се увезуваат. Единствен начин купувачите да го разберат тоа е да ја читаат декларацијата која има големина на фонтот од три милиметри. Мислам дека тоа е дискриминација и штета за граѓаните“, рече Борзан, истакнувајќи дека проблемот е што производителот може да го означи својот производ како домашен дури и иако некои од состојките се увезуваат.
Ознаката за земјата на потекло во моментов е задолжителна за производи како што се свежо и замрзнато месо, риба и јајца, а стратегијата разгледува проширување на обврската за посочување на земјата на потекло на прехранбените производи за кои етикетата „произведено во ЕУ“ засега е доволна .
„Потеклото на храната е една од главните детерминанти што влијаат врз изборот на потрошувачот, затоа ја поддржувам максималната транспарентност“, додаде Борзан.
Сокол предупреди на негативните последици што стратегијата може да ги има врз производителите на месо, со оглед на тоа што промовира намалување на потрошувачката на месо во корист на храната од растително потекло.
„Потрошувачите треба да добијат право на избор“, рече Сокол, додавајќи дека одлуките за овие прашања мора да бидат донесени врз основа на реални факти, и да се спречи спроведувањето на стратегијата да не доведе до намалување на производството, но и повреда на правата на потрошувачите .
Извор: Индекс.хр
