Чешка планира да воведе протекционистички закон со кој сака да ја заштити домашната храна, иако е свесна за политиката на Европската унија, односно за можни повреди на слободното движење на стоки во таа заедница.
На 20 јануари, долниот дом на чешкиот парламент усвои амандман на законот за храна, според кој продавниците поголеми од 400 м2 ќе треба да продаваат задолжително, минимум прехранбени производи произведени во таа земја, почнувајќи од 2022 година. Квотата треба да биде 55% следната година, со цел постепено зголемување, па да достигне 73% во 2028 година, пишува Деник.
Предвидени се и казни за кршење на правилата, кои се движат од 50 милиони круни, што е близу два милиони евра. Квотите треба да опфаќаат најмногу 15.000 видови прехранбени производи, вклучувајќи месо и зеленчук.
Целта на оваа политика е да се обезбеди поддршка на локалните производители. Нацртот сега треба да го потпише Сенатот, а потоа и претседателот, Милош Земан.
Пред гласањето за амандманот, министерот за земјоделство Мирослав Томан ги повика пратениците да бидат „малку националисти“ кога станува збор за чешката храна.
Иако ЕК не е подготвена да коментира во толку рана фаза, нејзиниот портпарол за Еурактив изјави:
„Слободното движење на стоки и услуги на внатрешниот пазар е најголем адут за задоволување на залихите низ ЕУ и исто така најдобро оружје за да се обезбеди закрепнување на сите“, додавајќи дека локалните ограничувања од секаков вид се контрапродуктивни.
Комисијата ќе ја спроведе анализата кога ќе биде усвоен чешкиот закон, а портпаролот открива дека овие мерки можат да создадат привилегирани пазарни услови за одредени прехранбени производи и со тоа да ги дискриминираат другите производители на храна во ЕУ и да спречат слободно движење на стоки.
Интересно е што премиерот на Чешка, Андреј Бабиќ, за медиумите коментираше дека не го иницирал овој предлог и не го поддржувал.
„Сметам дека е бескорисен политички потег што ги крши правилата на внатрешниот пазар на ЕУ“, рече тој. Но, иницијативата беше поднесена од неговата влада и одобрена од замениците на неговата партија.
Критичарите велат дека ваквиот закон ќе им помогне само на големите прехранбени компании, вклучително и на холдингот „Агроферт“, поранешна компанија „Бабис“. Сепак, портпаролот на Карел Ханзелка од споменатата компанија тврди дека нема никаква врска со усвоените амандмани.
„Не очекуваме новите регулативи да ни дадат предност или да ја сменат нашата позиција на пазарот“, заклучи тој.
Извор: Агроклуб
