Сè што расте во природата е уметност само по себе. Со тоа ќе се согласи секој што некогаш видел роса на лист пченица огреана од пролетното сонце.
Слично е со секое друго растение, дури и кога станува збор за гола црна бразда или за златно стрниште.
Нова димензија на убавината на она за што можеби дури и не сме свесни, даде холандскиот уметник Даан Рузгард, кој постави црвено, сино и ултравиолетово LED-осветлување и тоа во поле со праз на една мала фарма во близина на градот Лелиштад.
Тоа е дел од неговиот последен проект наречен „Grow“(Расте), со кој сакал да им оддаде почит на земјоделците и да ги охрабри да експериментираат со вештачка светлина во земјоделството на отворено, пишува Ројтерс.
Овој уметник на некој начин е инспириран и од сликарите од 16 и 17 век, кои биле опседнати со холандското небо, облаците и светлината. „Се чувствувам како дел од традицијата на оние што сликаа на платно“, вели тој, додавајќи дека неговото платно е поле со праз од 20.000 м2.
Овој вид на специјализирано осветлување се повеќе се користи кај вертикалните градини во затворен простор, но Рузгард во него гледа потенцијал и за одгледување на отворено.
LED диодите напојувани од соларни батерии, генерално ја зголемуваат светлината што ја добиваат растенијата во текот на денот. Сепак, овој проект има за цел да испита дали краткотрајното изложување на некои бранови должини од ултравиолетовата светлина може да ја намали потребата за пестициди.
Имено, проф. д-р Џејсон Варџент, водечки соработник во истражувањето и експерт за фотобиологија на растенијата, вели дека проектот е поддржан со научни истражувања кои покажуваат дека специфичната светлина како оваа може да го подобри растот и да ја намали употребата на пестициди до 50%.
Оваа фарма или изложба требаше да биде отворена за посетители, но со оглед на пандемијата од Ковид-19, до неа може да се пристапи само на веб-страницата на проектот. Сепак, целта на уметникот е овој проект да го примени во 40 различни земји во светот, каде што секоја инсталација ќе ја прикаже локалната или националната растителна култура.
Погледнете како изгледа полето со праз осветлено со LED диоди, во следното видео:
Извор: Агроклуб
